മുക്കാലാ മുക്കബുലാ.....എന്റെ ഫിലിപ്സിന്റെ ചെറിയ ടേപ്പ് റിക്കാര്‍ഡറില്‍ നിന്നും ഫുള്‍ ശബ്ദത്തില്‍ തകര്‍ക്കുവാ
"ഹോ..എന്നാ പാട്ടാ..ശരിക്കും ഇതൊക്കെ കേള്‍ക്കണേല്‍ സി ഡി പ്ളയര്‍ വേണം.
ഈ കസെറ്റ് ഇട്ടാലോന്നും അത്രേം ഇടി കിട്ടത്തില്ല ..ഞാനിന്നലെ കൊച്ചിയില്‍ ഉള്ള അമ്മാവന്റെ വീട്ടില്‍ പോയപ്പോള്‍ അവിടുത്തെ സി ഡി പ്ളയരില്‍ ഈ പാട്ട് കേട്ടു ..എന്നാ ഇടി ആണന്നറിയാമോ..ചങ്ക് തകര്‍ന്നു പോകും "
പപ്പന്‍ അത് പറഞ്ഞപ്പോളാണ് മനസ്സില്‍ ലഡ്ഡു പൊട്ടിയത് . രണ്ടു ദിവസം കൂടി കഴിഞ്ഞാല്‍ അച്ഛന് എത്തും.
നീണ്ട നാല് വര്‍ഷത്തെ പ്രവാസ ജീവിതത്തിനിടയില്‍ ആദ്യമായാണ് അച്ഛന് നാട്ടില്‍ വരുന്നത്.
"നിനക്കെന്നാടാ ഞാന്‍ വരുമ്പോള്‍ കൊണ്ടുവരെണ്ടേ " എന്ന് ചോദിച്ചപ്പോള്‍ പിന്നെ പറയാം അച്ഛാ എന്നാ പറഞ്ഞെ ..
ഇത് തന്നെ പറ്റിയ അവസരം ഇന്ന് വിളിക്കുമ്പോള്‍ പറയണം സി ഡി പ്ലയെര്‍ വേണമെന്നു.എന്നിട്ട് വേണം പപ്പന്റെ ഒക്കെ മുന്നില്‍ ഞെളിഞ്ഞു നിക്കാന്‍ ..അവന്റെ അമ്മാവന്റെ സി ഡി പ്ലയെര്‍ ..ഹും
അവനൊക്കെ ഇനി പാട്ട് കേള്‍ക്കാന്‍ ഇവിടെ വരും , ബാസ് കൂട്ടി വച്ച് നെഞ്ചിന്‍ കൂട് തകര്‍ത്തു വിടണം
അങ്ങനെ ദിവാസ്വപ്നം കണ്ടിരിക്കെ അമ്മയുടെ വിളി വന്നു ..
"എടാ അച്ഛന് ഫോണ്‍ വിളിക്കുന്നു ഓടി വാ .."
"ഹലോ ..അച്ഛാ ഞാനാ .."
"ആ നീ ആലോചിച്ചോ ..എന്നാ വേണ്ടേ "
ഒറ്റ ശ്വാസത്തില്‍ പറഞ്ഞു .."സി ഡി പ്ലയെര്‍ വേണം ..""എന്നതാ എന്നതാ .."
"സി ഡി പ്ലയെര്‍ ..നല്ല ബാസ് ഉള്ളത് വേണം ..വീട്ടില്‍ വച്ചാല്‍ താമരക്കുളത്ത് കേള്‍ക്കണം "..
"അത് മാത്രം മതിയോടാ.."
"പിന്നെ അച്ഛന് ഇഷ്ടമുള്ളതൊക്കെ കൊണ്ടുപോരെ ..."
ഹോ...അങ്ങനെ എനിക്കും സി ഡി പ്ലയെര്‍ കിട്ടാന്‍ പോകുന്നു ..ഈ വള്ളിച്ചിറ കരേല് ഇടുക്കള സാറിന്റെ വീട്ടില്‍ മാത്രമേ ഉള്ളു സി ഡി പ്ലയെര്‍ .ബേബി ചേട്ടന്‍ അമേരിക്കെന്നു കൊണ്ട് വന്നതാ ..അവിടെ ആണേല്‍ ആരും അത് ഓണ്‍ പോലും ചെയ്യാറില്ല .
അങ്ങനെ എന്റെ വീട്ടിലും സി ഡി പ്ലയെര്‍ വരുന്നു ..ഈ വാര്‍ത്ത എല്ലാരേം അറിയിക്കണം ..
എല്ലാര്ക്കും കുശുമ്പ് തോന്നുമാരിക്കും ..തോന്നട്ടെ എനിക്കെന്നാ ചേതം ..
സി ഡി പ്ലയെരിന്റെ കാര്യം പറഞ്ഞതു കൊണ്ടാന്നു തോന്നുന്നു കളിയ്ക്കാന്‍ ചെന്നപ്പം ഫസ്റ്റ് ബാറ്റിംഗ് കിട്ടി ...
കാത്തിരിപ്പിന്റെ രണ്ടു ദിവസങ്ങള്‍ ..ഓരോ നിമിഷവും കഴിയാന്‍ പ്രാര്‍ഥിച്ചു കൊണ്ടിരുന്നു അങ്ങനെ ആ ദിവസം വന്നെത്തി..
മോഹനന്‍ കൊച്ചിച്ചന്റെ ടാറ്റ സുമോയില്‍ ഞാനും അമ്മയും അനിയത്തിയും അമ്മാവനും കൂടി രാവിലെ കൊച്ചിക്ക് പുറപെട്ടു. വഴിയില്‍ വച്ച് പപ്പനേം മുല്ലുനേം കണ്ടെങ്കിലും മൈന്‍ഡ് ചെയ്തില്ല വല്യ ഗമയില്‍ അങ്ങിരുന്നു.
അച്ഛനെ കാത്തുള്ള ആ ഇരുപ്പ്‌ , അതൊരു ഇരിപ്പ് തന്നെ ആരുന്നു
ആ ഫ്ലൈറ്റ് എത്തി ..അമ്മാവന്‍ അനൌണ്‍സ്മെന്റ് കേട്ട് പറഞ്ഞു ..
ഞങ്ങള്‍ എല്ലാം അക്ഷമരായി അച്ഛനെ കാത്തു പുറത്തു നില്‍ക്കുമ്പോള്‍ , ഓരോരുത്തരും ട്രോളിയില്‍ വലിയ കെട്ടുകളും തള്ളിക്കൊണ്ട് ഇറങ്ങുന്നു ..
"ഇതെന്ന അച്ഛനെ കാണാത്തെ അമ്മെ"
"ഇപ്പൊ വരുമെടാ "
നാല് വര്‍ഷം കൂടി അച്ഛനെ കാണുന്നതില്‍ ഉള്ള ആഗ്രഹത്തേക്കാള്‍ അച്ഛന് കൊണ്ട് വരുന്ന സി ഡി പ്ലയെരിനെ പറ്റി ആരുന്നു മനസ് മുഴവന്‍ ..സി ഡി കൂടെ കൊണ്ട് വരാന്‍ പറയാമാരുന്നു എന്നൊക്കെ അങ്ങനെ ചിന്തിച്ചു നില്‍ക്കുമ്പോള . അമ്മാവന്റെ വക ചങ്കി കുത്തുന്നെകൂട്ടു ചോദ്യം .
ഇനിം കസ്ടംസു കാരു വല്ലോം പിടിച്ചോ ..
കസ്റംസ് കാരു പിടിച്ചാല്‍ സി ഡി പ്ലയെര്‍ അവര് എടുക്കുമോ അമ്മാവാ..ഞാന്‍ ആകെ ടെന്‍ഷന്‍ ആയി
ആളു വന്നിലെലും അവനൊക്കെ സി ഡി പ്ലയെര്‍ കിട്ടിയാല്‍ മതി ..മിണ്ടാതിരിയെട ചെറുക്ക ..
അമ്മ മനസിനെ ടെന്‍ഷന്‍ മുഴവന്‍ എന്നോട് തീര്‍ത്തു ..
അങ്ങനെ നോക്കി നോക്കി നില്‍ക്കുമ്പോള്‍ വരുന്നുണ്ട് ....
അമ്മെ അച്ഛന് ..ഞാനും അനിയത്തിം അച്ഛനെ നോക്കി കൈ വീശി കാണിച്ചു ..
ഞങ്ങളെ കണ്ട അച്ഛന്റെ മുഖത്ത് ഭയങ്കര സന്തോഷം ..അമ്മ കരച്ചില്‍ ആരംഭിച്ചു കഴിഞ്ഞു .
കയ്യില്‍ വലിയ ഒരു കേട്ടുണ്ട് ..അതും ട്രോളിയില്‍ തള്ളി കൊണ്ടാണ് വരുന്നത് ..
എന്റെ മനസ്സില്‍ വീണ്ടും ലഡ്ഡു പൊട്ടി ..ഹോ അച്ഛന് മറന്നില്ല ..പക്ഷെ ഒറ്റ കേട്ടെ ഉള്ളല്ലോ ..സി ഡി പ്ലയെര്‍ മാത്രമേ വാങ്ങിച്ചു കാണൂ ..എനിക്ക് വേറെ ഒന്നിലും യാതൊരു തല്പര്യോം ഇല്ലല്ലോ ..
നാല് വര്‍ഷത്തിനു ശേഷം ഭാര്യയെയും മക്കളെയും കണ്ട അച്ഛന്റെ സന്തോഷം, അത് വാക്കുകള്‍ കൊണ്ട് വര്‍ണിക്കാന്‍ സാധിക്കുമാരുന്നില്ല .. അച്ഛന് ഓടി വന്നു ഞങ്ങളെ കെട്ടി പിടിച്ചു ..പാവത്തിന്റെ കണ്ണ് നിറഞ്ഞിരുന്നു.
ഫോണില്‍ കൂടി സംസാരിക്കുമെങ്ങിലും വര്‍ഷങ്ങള്‍ക്കു ശേഷം നേരില്‍ കണ്ടകൊണ്ടാവം എനിക്ക് അച്ഛനോട് മിണ്ടാന്‍ തന്നെ നാണം ആരുന്നു. അച്ഛന് എന്നെ ഒരു വശത്തേക്ക് ചേര്‍ത്ത് പിടിച്ച് എല്ലാരോടും വിശേഷം ചോദിക്കുന്നു, ..എങ്ങിലും ഞാന്‍ തിരിഞ്ഞു തിരിഞ്ഞു ആ കേട്ടിലേക്ക് നോക്കുവാരുന്നു ..അമ്മാവന്‍ അതും തള്ളി ഞങ്ങളുടെ പുറകെ ഉണ്ട് ..
വീട്ടിലേക്കുള്ള യാത്രക്കിടയില്‍ അച്ഛന് വാ തോരാതെ എല്ലാരോടും സംസാരിചോണ്ടിരിക്കുവാ ..
എന്റെ ശ്രദ്ധ മുഴവന്‍ ആ കേട്ടിലാരുന്നു ..അച്ഛന് ആണേല്‍ സി ഡി പ്ലയെരിനെ പറ്റി ഒന്നും സംസാരിക്കുന്ന്നുമില്ല ..സൌദിയിലെ വിശേഷങ്ങളും അവിടുത്തെ റോഡ്‌ അങ്ങനെയാണ് ഇങ്ങനെയാണ് ..
അങ്ങനെ ഞങ്ങള്‍ വീട്ടിലേക്കുള്ള വഴിയില്‍ എത്തി...
രാവിലെ തൊട്ടു പെയ്യുന്ന തോരാത്ത മഴാ കാരണം വഴി മുഴവന്‍ ഒറവ കുഴി ആയി..
വണ്ടി ഇറക്കിയാല്‍ ടയര്‍ താന്ന് പോകാന്‍ സാധ്യത ഉണ്ടന്ന് ഡ്രൈവര്‍ ചേട്ടന്‍ പറഞ്ഞു ..
എന്നാ വേണ്ട സുഭാഷേ ..ഇനി എന്നാ ദൂരമുണ്ട് നമക്കങ്ങു നടക്കാം ..
അപ്പൊ ഈ കെട്ടോ ..അമ്മ ചോദിച്ചു ...
"ഓ അതെന്ന ഞാന്‍ കയ്യില്‍ എടുത്തോളാം" എന്ന് പറഞ്ഞു അച്ഛന് ചാടി ഇറങ്ങി ..
ഗള്‍ഫില്‍ നിന്നും രവി വരുന്നു എന്ന് പറഞ്ഞു അയല്പക്കംകാരെല്ലാം വീട്ടില്‍ വന്നിരുപ്പുണ്ട് ..
അവര് നോക്കുമ്പോ അച്ഛന് തലയില്‍ കേട്ടും ചുമന്നു വരുന്നു ..
എനിക്കാണേല്‍ നാണം കേട്ടിട്ട് ആരേം നോക്കാന്‍ കൂടി തോന്നിയില്ല ..
അച്ഛന് പുല്ലു പോലെ ആ കേട്ട് ചുവന്നു വീട്ടിലേക്കു കേറി ...
"അപ്പൊ അവിടെ ഇതാരുന്നോ തൊഴില്‍" എന്ന തങ്കപ്പന്‍ ചേട്ടന്റെ പരിഹാസം നിറഞ്ഞ ചോദ്യം ..
എല്ലാരുടേം അടക്കി പിടിച്ചുള്ള ചിരി ...അതിനിടയില്‍ കൂടി ഞങ്ങള്‍ വീട്ടിലേക്കു കേറി.
എല്ലാവന്റെം ചിരിം കളീം ഒക്കെ ഇപ്പൊ തീരും ആ കെട്ടോന്നു പോട്ടിചോട്ടെ ..
സി ഡി പ്ലയെര്‍ കണ്ടു ഇവന്മാരെല്ലാം കുശുംബിക്കും ഞാന്‍ മനസ്സില്‍ പറഞ്ഞു.
ടപ്പേ ..അച്ഛന് തലയില്‍ നിന്നും ആ പെട്ടി നിര്‍ദാക്ഷിണ്യം തെഴെക്കിട്ടപ്പോള്‍ തകര്‍ന്നത്‌ ..
എന്റെ മനസ്, എന്റെ സ്വപ്‌നങ്ങള്‍, എന്റെ ആഗ്രഹങ്ങള്‍ ...
സി ഡി പ്ലയെര്‍ ഉള്ള പെട്ടി ആരേലും ഇങ്ങനെ താഴെയിടുമോ ..
അച്ഛാ ...നാണം മറന്നു ഞാന്‍ വിളിച്ചു ...സി ഡി പ്ലയെര്‍ പൊട്ടും..
ഏതു സി ഡി പ്ലയെര്‍ ..ഏയ്‌ അതൊന്നും പോട്ടതില്ല ...
വീണ്ടും മനസ്സില്‍ ലഡ്ഡു പൊട്ടി ...ഹോ താഴെ വീണാല്‍ പോലും പൊട്ടാത്ത സി ഡി പ്ലയെരാ ..
അല്ലെലും ഈ ഫോറിന്‍ സാധനം എല്ലാം നല്ല ക്വാളിറ്റി ആരിക്കും ..ഞാന്‍ മനസ്സില്‍ കരുതി.
കുറെ നേരത്തെ കുശലാന്വേഷണങ്ങള്‍ക്ക് ശേഷം ഓരോരുത്തരായി കളം പിരിഞ്ഞു ...
ഹോ കാത്തിരുന്ന ആ നിമിഷം വന്നെത്തി..പെട്ടി പൊട്ടിക്കല്‍ ..
അച്ഛന് കത്തി എടുത്തു കാര്‍ബോഡിന്റെ നടുവിലൂടെ വരഞ്ഞു ..
അതാ ..പെട്ടി തുറക്കാന്‍ പോണു ..
കുറെ കടലാസ് പോലത്തെ ഷര്‍ട്ട്‌ ..റൂം സ്പ്രേ, പേന, പെന്‍സില്‍ ..എല്ലാം കണ്ടു ..
പക്ഷെ എന്റെ സി ഡി പ്ലയെര്‍ ..
ഞാന്‍ വീണ്ടും ചോദിച്ചു. അച്ഛാ സി ഡി പ്ലയെര്‍ ..
ആഹ..നിന്റെ സി ഡി പ്ലയെര്‍ ...അതെന്തിയെ....ഞാന്‍ ഇതില്‍ വച്ചതാരുനല്ലോ..
ആഹ കിട്ടി ..ഇന്നാ..ഞാന്‍ വിചാരിച്ചു ഇതിനൊക്കെ വല്യ വില ആകുമാരിക്കും എന്ന് . ഒരെന്നതിനു ഒരു റിയാലെ ഉള്ളു സൊ ചീപ് ..അതും പറഞ്ഞുള്ള അച്ഛന്റെ ചിരി..
TDK യുടെ ആ പത്തു CD ഞാനിന്നും സൂക്ഷിച്ചു വച്ചിട്ടോണ്ട് ...
"നിനക്ക് സന്തോഷമായില്ലേ .."
അച്ഛന്റെ ചോദ്യത്തിന് ഞാന്‍ മറുപടി ഒന്നും പറഞ്ഞില്ല സി ഡി പ്ലയെരിനു പകരം
സി ഡി കിട്ടിയവനെന്തു സന്തോഷം
തകര്‍ന്ന ഹൃദയവും കയ്യില്‍ പത്തു TDK blank CD-യുമായി ഞാന്‍ ഇരുന്നു.
മുക്കാല മുക്കബുല...മ്യൂസിക്‌ ഒഴുകിയെത്തി ...
അനിയത്തി പോയി ടേപ്പ് റെകോര്‍ഡര്‍ ഓണ്‍ ചെയ്തതാവാം ..
എന്തായാലും നല്ല ബാസോട് കൂടി എന്റെ ചങ്കിടിക്കുന്നുണ്ടാരുന്നു ...
